Ruta 'Per Caminho de Lampai'

O nome deste ruta extraémolo dun verso do trobador Compostelán Joán Airas.
Un dos camiños medievais a Santiago atravesaba o Concello de Teo de norte a sur e subía cara Lampai para despóis baixar por Carcacía en dirección a Padrón, seguindo logo cara o sur de Galicia e norte de Portugal, pois a fronteira era ben fluída.
Polo menos iso é o que se desprende do texto da Cantiga XXII do Cancioneiro de Joán Airas de Santiago, un burgués compostelán que exerceu a súa arte de trobar entre os anos 1250 e 1275 nas cortes dos reis Afonso X o Sabio (de Galicia, León e Castela), e de Afonso III e de Don Dinís (de Portugal). Nela aparece o nome da parroquia de Lampai rimando con Cambrai, unha cidade francesa - hoxe con cerca de 40.000 habitantes - con sona universal desde a Idade Media polos seus refinados panos.
Como a maior parte das cántigas dos nosos trobadores medievais foron copiadas en Portugal no século XIV, aparecen as grafías portuguesas lh (ll) e nh (ñ), de ahí que caminho aparece escrito desa maneira.
Nesta cantiga de amor, de catro estrofas, o poeta ou cantor -pois as cantigas non eran para recitar, senón para cantar (por iso se chaman así)- mostra a súa desesperanza pola marcha da muller amada; evoca a dama cabalgando fermosa na súa mula baia saíndo de Compostela polo camiño de Lampai, ricamente vestida "dun pres de Cambrai".