Transpirenaika 8: Elizondo - Zarautz

Elizondotik errepide zaharretik Oronotz-Mugairera joango gara eta bertatik Doneztebera. Errepide nazionala saihestearren Bidasoako bide berdea hartuko dugu, ormigoi eta harri txintxarrez dagoen arren nahiko ondo jasan dute errepideko bizikletan (28 eta 32ko zabalerako kubiertak). Bidasoa ibaiaren ondotik leun leun goaz, Behobian bidegorri hartu eta Irunera iristen gara. Hemen errepide nazionala hartzea tokatzen da 3 bat kilometroz Hondarribiako irteeraraino. Bertan, bidaia honen oinarri izan den trackaren egileekin topatzen gara (eskerrik asko Gorka eta Alberto 11takoa eta emandako informazio guztiagatik!!) elkarrekin atseden hartuz.
Jarraian eguneko lehen zailtasuna dugu, Jaizkibel 9.6ko igoera, hasiera leuna malda gogorrekin tartekatzen du Guadalupe bitartean. Santutegiaren ostean atsedengune bat dator malda gogorrenei ekin aurretik. Amaieran errepidea leuntzen da, azken kilometroak eramangarri eginaz. Kantauri itsasoa berriz ikusten dugun honetan Lezora bizi jaisten den errepidetik goaz, berriz ere zati bat nazionaletik eginaz Pasaiako eremuan. Ondoren bidegorri hartu eta hor goaz Buenabistatik Mirakruzeko gaina hasi bitartean. Hemen errepidera sartzen gara Zurriolaraino, berriz ere bidegorria hartuz Donostia zeharkatzeko.
Hondarretan Igeldo auzora doan bidea hartzen dugu eguneko azken aurreko zailtasunari ekiteko. Igoera tentea den arren ez da luzea, atseden gune bat ere badu. Kanpiñetik Polipasora ordea berriz ere gogortzen da Oriko Bentara iritsi arte. Zuloz beteriko errepide estutik iristen gara Oriora 634 errepidetik herria zeharkatu eta erreka ondotik bidaiako azken igoerari helduko diogu, Talai-Mendi Txurrukatik. Honela amaitzen da Roses-en hasitako bidaia ahaztezina.