Tanspiranaika 2: Ripoll - Saint Juliá de Lória

Ripolletik atera eta ordekan egingo dira lehen kilometroak Campdevánol arte. Hemen hasiko da Creuetarako igoera luzea. Errepide estua eta trafikorik gabea, lasai. Malda gogorrik gabe lehen zatia basotik egiten da. Jaitsiera txiki baten ostean berriz ere gorantzako bidea hartzen da. Castellar de n'Hugen errepide nagusiarekin batzen den arren ez da trafiko gehiegirik antzematen. Hemendik gailurrera beste 10 bat kilometro geratuko dira, malda iraunkorrekin.
Behin gaina harrapatuta La Molinara joateko 3 bat km jaitsi eta 2 igo beharko dira, horik aurrera Alperaino jaitsiera erosoa trafiko gehiagorekin. Alpetik Puigcerdá-ra gorantz doan sasiordeka aurkitzen da, ez da toki txarra indarrak hartzeko, Puymoreneseko igoera hasi baino lehen (Latour de Carol) dauden 10 kilometroak luze egin daitezke bestela. Jarraian 18kmko igoera luzea hasten da, malda gogorrik ez duen arren beroak eta hanketan pilatutako kilometro kopuruak gogortzen dute. Altuera hartu ahal bertatik ikus daitekeen paisaiak egindako esfortzua saritzen du. Gora iritsi ostean 2kmko jaitsiera dago eguneko azken maldari ekiteko, d'Envalira. Hau da zeharkaldiko punturik garaiena, 10 km dira eta beldurtzeko portzentaiarik izan ez arren, trafikoak, beroak, aurretik igotakoak eta altuerak igoera asko gogortu dezakete. Atseden hartu eta indarrak berritzeko bideko gasolindegi bat edo Pas de la Case izan daitezke egokiak (gailurretik 4kmra). Goitik behera jaitsiera luze bezain erosoa egitea besterik ez zen geratuko.